Jos 17 | NdeIBE | STEP | Lesi kwakuyisabelo sesizwana sikaManase njengezibulo likaJosefa, okutsho esikaMakhire, izibulo likaManase. UMakhire wayengukhokho wamaGileyadi, owayamukele uGileyadi loBhashani ngenxa yokuthi amaMakhire ayengamaqhawe amakhulu.

Joshua 17

1 Lesi kwakuyisabelo sesizwana sikaManase njengezibulo likaJosefa, okutsho esikaMakhire, izibulo likaManase. UMakhire wayengukhokho wamaGileyadi, owayamukele uGileyadi loBhashani ngenxa yokuthi amaMakhire ayengamaqhawe amakhulu. 2 Ngakho isabelo lesi sasingesabantu bonke bakoManase – izinsendo zika-Abhiyezeri, uHeleki u-Asiriyeli, uShekemu, uHefefi loShemida. Lezi ngezinye izizukulwane zesilisa zikaManase indodana kaJosefa ngezinsendo zazo.

3 UZelofehadi indodana kaHeferi, indodana kaGileyadi, indodana kaMakhire indodana kaManase, wayengelamadodana kodwa wayelamadodakazi wodwa, amabizo awo kwakunguMahla, uNowa, uHogila, uMilikha loThiriza.

4 Aya ku-Eliyazari umphristi, loJoshuwa indodana kaNuni, labakhokheli athi, “UJehova walaya uMosi ukuthi asabele ilifa kanye labanewethu.” Ngakho uJoshuwa wabanika ilifa ndawonye labanewabo bakayise, kulandelwa umlayo kaJehova. 5 Isabelo sikaManase sasigoqela iziqinti ezilitshumi zomhlabathi eceleni leGileyadi leBhashani empumalanga yeJodani, 6 ngenxa yokuthi amadodakazi esizwana sikaManase azuza ilifa phakathi kwamadodana. Umhlaba weGileyadi wawungowezizukulwana zikaManase.

7 Ilizwe likaManase lalisukela e-Asheri lisiya eMikhimethathi empumalanga yeShekemu. Umngcele wawudabula usiya eningizimu usukela khonapho ugoqela abantu ababehlala e-Eni Thaphuwa.

8 (UManase wayelomhlaba elizweni leThapuwa, kodwa iThapuwa ngokwayo, emngceleni kaManase, yayingeyama-Efrayimi.) 9 Umngcele waqhubeka eningizimu usiya eDongeni lweKhana. Kwakulamadolobho ka-Efrayimi ayakhelwe phakathi kwamadolobho kaManase, kodwa umngcele kaManase wawulicele langenyakatho yodonga njalo uphelela olwandle. 10 Eningizimu ilizwe lalingelika-Efrayimi, enyakatho lisiyakhawula koManase. Ilizwe lika Manase lalifika olwandle njalo lingcelelane lo-Asheri enyakatho lo-Isakhari empumalanga.

11 Phakathi kuka-Isakhari lo-Asheri uManase wayeloBhethi Shani, u-Ibhileyami labantu beDori, abe-Endori, abeTanakhi leMegido, ndawonye lemizana ababakhelane layo (owesithathu eluhlwini kwakunguNafothi).

12 Kanti-ke abakoManase babengenelisi ukuhlala emadolobheni ngoba amaKhenani ayezimisele ukuhlala kuleso sigaba.

13 Lanxa kunjalo kwathi abako-Israyeli sebelamandla amakhulu benza amaKhenani izigqili zabo kodwa kababaxotshanga kokuphela.

14 Abantu bakoJosefa bathi kuJoshuwa, “Kungani lisinike isabelo esisodwa kuphela lengxenye eyodwa yelifa? Singabantu abanengi kakhulu njalo uJehova usibusise ngezipho ezinengi.”

15 UJoshuwa wabaphendula wathi; “Uma libanengi kakhulu, njalo nxa ilizwe lamaqaqa elako-Efrayimi lilincinyane kini, ngenani eguswini liyecenta umhlaba ube ngowenu elizweni lamaPherizi lelama Refayithi.”

16 Abantu bakoJosefa baphendula bathi, “Ilizwe lamaqaqa kaliseneli njalo amaKhenani wonke ahlala emagcekeni alezinqola zensimbi, bonke abase Bhethi Shani lemizana yakhona lalabo ababehlala esigodini seJezerili.”

17 Kodwa uJoshuwa wakhuluma kwabendlu kaJosefa – ku-Efrayimi loManase wathi – “Libanengi njalo lilamandla amakhulu kakhulu. Kalisoze libe lesabelo esisodwa kuphela,

18 kodwa lelizwe lamaqaqa eliligusu. Licenteni lize liyefika lapho eliphelela khona kube ngelenu; lanxa amaKhenani elezinqola zensimbi njalo lanxa elamandla, lingawaxotsha.”